I AMISSI DE VIA SAN MASSIMO

Ve fasso un fià de storia de come che gera Vìa S.Massimo nei ani 40 su par zò. Scumissiemo dall'ospedae e vegnemo in zò verso el canae:

"Nell'angolo a destra ghe gera un frutarolo ciamà "Pavan” dopo de lù se ndà "Baffo". Nell'angolo a sinistra ghe gera na edicola e la parona se ciamava "Mafalda" cugina de Pavan. Vegnendo vanti sempre a destra ghe gera na custodia de biciclete e de cavai, i paroni se ciamava "i veci Mezaira".

Vegnendo un fià più vanti ghe gera l'albergo Morgagni el quae Morgagni ze sepeìo nea cesèta de S.Massimo. Vegnendo più vanti ghe gera el Dispensario, dove che i te vardava i polmoni se i gera boni. Difronte al Dispensario trovemo el convento de frati che insegna teologia. Più vanti, sempre a destra ghe gera el Don Bosco, dove che e muneghe faseva scola ae tose e là i faseva anca el teatro. Difronte, a sinistra ghe gera l'asilo par i putèi e mi gero uno de quei (ghì da pensare che par andare a scola me mama e me sorèa e me ciapava una par i brassi e una par e gambe da tanto bon ghe gero). Tornando un fià più indrio a destra ghe gera la casa dei malài cronici e al piano tera ghe gera la sala da ballo che nialtri la ciamavimo "La stalla d'oro", parlo de 70 ani fa giusti.

Difronte ghe gera na mureta co na portesina co "Daniele" che fazeva el caegàro dentro; ma dopo se sta butà so tuto e se nata l’oficina de "Tristano Tormene", adesso ghe se la casa del fiolo de so sorèa. Più vanti ghe gera ancora el convento dee "Vincensine" che adesso el se ciama "Maria Bambina". Vegnendo più avanti, ala fine del portego ghe gera na mureta co un campeto dove ghe stava "Mesaìra dei mussi”, parche el vendeva mussi Più vanti ghe gera ea ostaria de Ponchia col zugo dee bàe, adesso i ga fato un bel palasso veramente beo. Difronte ghe stava l'economo dell’ospedae che se damava "Costa " e de fianco ghe stava el sorvegliante dell’ospedae che se ciamava "Zambrotto Calò".

Più vanti ghe gera un portòn grando e là ghe stava "Farsura" che fazeva piastrèe, dentro ghe stava anca "Rampazzo" che de soranome lo ciamavimo "Tenore Rovinassi", papà de "Giorgio". Un fià più vanti ghe gera na officina de machine. Difronte a sinistra ghe ze casa mia, dove che abitava "Ottorino Gnocco". Dopo casa mia proprio nell'angolo ghe stava la "Nea Beccara" mare di "littorio" detto "Capeòte", nostro amico. Difronte ghe gera la bottega del casoìn chel se damava "Perussi" ma nialtri lo ciamavino "Reda ". Davanti ghe gera la "Cesèta de S.Massimo " che allora la gheva anca el so Campanie ma chel ze andò zò co na bomba de aereo. Difronte che fa angolo col ponte ghe stava el frutarolo che se damava "Polo ", adesso ghe sta "Gruden " queo dei sacheti chel gà el Campetto dove che nialtri zugàvino. Dopo la cesèta ghe stava "Bravo" che lavorava e pèe de vaca par fare el curame, el gera molto bravo a sonare l'organo in cesa.

Dopo subito ghe gera la famosa "Corte dei Moèta" dove ghe stava 9 fameie con un cesso solo; adesso ghe se un palasso che ghe sta africani, pachistani, indiani e anca putane. Scumissia el canale da dove che sta "Piero Rigato", dopo subito ghe gera na stradèa e là ghe stava "Rossetto" l'idraulico, "Amabìe", "Naesso l'idraulico", la "Candida", el tassista "Riva", "Pasquale Forsin", el giornalaro che no ricordo el nome e la "Biscaro". Andemo più vanti, ghe gera la Fondarla dei "Zanini" e dentro in corte ghe stava i "Bacco", i "Naesso" che i gera andà stare là e el "Tartaro". Dopo ghe gera ifradei "De Lorenzi". Più vanti ghe gera la fondarla de "Tormene Pogliuto" e alla fine dea strada ghe gera na corte e là ghe stava "Ferro" chel cantava sempre imbriago, ghe stava anca "Bettella" el pitòre, i "Zugliani" che lavorava in triparìa, la bionda "Paruchiera" e "Tosato" queo che faseva e paste, el mario dea "Racheta". Più vanti ghe gera el deposito dee scoàsse e par finire el ponte dee aree dove che se nato "Piero Rigato" e dove che gera anca el canae.

Via S. Massimo finiva proprio là cussi me la ricordo mi, come che me ricordo ben de tuta sta brava gente che gò nomià, chissà dove che i zè andà a finire.

Fausto Pasqualotto "el moèta "

Presidente dei Amissi de S.Massimo